ᐃᓚᒌᓂ ᐱᖁᔭᖅ
ᐃᓕᑦᑎᒃᑲᓂᕈᓐᓇᑦᑐᑎᑦ
ᑭᓲᒻᒫᑦ ᐃᓚᒌᓄᑦ ᐱᖁᔮᖅ?
ᒪᓕᒐᓕᕆᓂᕐᒧᑦ ᐱᓕᕆᕝᕕᑦ ᑲᑎᒪᔨᖏᑦ ᓄᓇᕗᒻᒥ ᐱᒐᔅᓴᐅᑎᑦᑎᒻᒪᑕ ᐃᓚᒌᓄᑦ ᒪᓕᒐᑦᑎᒍ ᐃᑲᔪᕈᑎᒥᒃ ᒪᑯᓇᓂ ᑎᒍᔭᐅᓯᒪᓂᒻᒥ, ᐱᒍᓐᓇᑎᑕᐅᓂᒻᒥᒃ, ᓱᕈᓯᒻᒥᒃ ᐃᑲᔪᕈᑎᒥ, ᓄᓕᐋᒻᒥᒃ ᐃᑲᔪᕈᑎᒥᒃ, ᓱᕈᓯᐅᑉ ᖃᓄᐃᖏᑦᑎᐊᑦᑎᑕᒍᑎᖓᓄᑦ, ᖃᓄᐃᖏᑦᑎᐊᑦᑎᑕᐅᖁᓪᓗᒍ ᓴᐳᒥᔭᐅᓂᒻᒥ, ᐱᖃᓯᐅᑎᓇᒍ ᐱᓯᒪᓂᖅ ᑲᑎᑎᑕᐅᓯᒪᔪᓐᓄᒃ ᐊᖏᕐᕋᒥᒃ, ᓴᐳᒻᒥᔭᐅᑎᑦᑎᓂᒻᒧᑦ ᒪᓕᑦᑕᐅᖁᔭᐅᔪᖅ ᐅᑯᑎᒎᓇ ᓱᕈᓯᓐᓄᑦ ᐱᕿᔭᖅ ᒪᓕᒐᖅ ᐊᒻᒪᓗ ᐃᓚᒌᓄᑦ ᐱᖁᔭᖅ ᒪᓕᒐᖅ, ᐊᒻᒪᓗ ᐃᖅᑲᑦᑐᑦᑕᐅᓂᖅ ᐅᑯᑎᒎᓇ ᐋᖅᑭᐅᒪᑎᑦᑎᓂᒻᒧᑦ ᒪᓕᑦᑕᐅᖁᐅᔪᖅ ᒪᓕᑦᑕᐅᑎᑕᐅᓂᖏᓄᑦ ᒪᓕᒐᖅ.
ᐃᓚᖏᓐᓂ ᖃᓄᐃᓘᓂᐅᔪᓂ, ᒪᓕᒐᑦᑎᒍ ᐃᑲᔪᕈᑎ ᐱᔭᐅᑎᑦᑎᒍᓐᓇᒻᒪᑦ ᐅᑯᑎᒎᓇ ᑎᒍᐋᓐᓂᒻᒧᑦ ᒪᓕᒐᒃᑯᑦ, ᓄᓇᖃᖅᑳᒃᓯᒪᔪᓄᑦ ᐱᖅᑯᓯᖅ ᑎᒍᐊᓂᐅᑉ ᐃᓕᓴᕆᔭᐅᓂᖓᓄᑦ ᒪᓕᒐᖅ, ᐊᒻᒪᓗ ᓱᕈᓯᒻᒥᒃ ᑭᒡᒐᑦᑐᐃᓂᒻᒧᑦ ᐱᓕᕆᔾᔪᑎᓂᑦ.
ᓱᕈᓯᒻᒥᒃ ᐃᑲᔪᕈᑎᑦ ᐊᑐᑦᑕᐅᓗᐋᑕᓱᑦ ᓄᓇᕗᒻᒥ
ᑭᓲᒻᒫᑦ ᓱᕈᓯᒻᒦᒃ ᐃᑲᔪᕈᑏ?
ᑕᒪᒃᑮᒃ ᕿᑐᖓᖃᑦᑎᐅᔪᒃ ᐃᑲᔪᕆᐊᖃᒻᒪᑎᒃ ᑮᓇᐅᔭᖃᑦᑎᑦᑎᓗᑎᒃ ᐃᑲᔪᕈᑎᒋᓗᓂᒋᑦ ᕿᑐᖓᖏᓐᓂᒃ. ᕿᑐᖓᖃᑦᑎᐅᔪᒃ ᐊᕕᑎᓪᓗᒋᒃ, ᕿᑐᖓᒥᓐᓂᒃ ᐸᖅᑭᔭᐅᑎᐋᑦᑎᑦᑎᒋᐊᖃᒻᒪᑎᒃ ᐱᓯᒪᔭᐅᑦᑎᐋᓪᓗᑎᒃ. ᑕᐃᒪᓐᓇᐃᑐᑦ ᑮᓇᐃᔭᐃᑦ ᑕᐃᔭᐅᓲᖑᒻᒪᑕ “ᓱᕈᓯᒻᒥᒃ ᐃᑲᔪᕈᑎᓂᒃ”. ᑮᓇᐅᔭᖅ ᐱᒍᓐᓇᐅᑎᒋᔭᐅᒻᒪᑦ ᓱᕈᓯᒻᒧᑦ − ᐃᑲᔪᕆᐊᖃᕋᕕᒋᒃ ᕿᑐᖓᑎᑦ.
ᑭᓇ ᓱᕈᓯᒻᒥᒃ ᐃᑯᔪᕈᑎᒥᒃ ᐊᑭᓕᔅᓱᐃᕙᒻᒫᑦ?
ᐃᒪᓐᓇᐅᒐᔪᑦᑐᖅ, ᓱᕈᓯᒻᒥᒃ ᐃᑲᔪᕈᑎᑦ ᐊᑭᓕᔅᓱᑦᑕᐅᓲᖑᕗᑦ ᑕᐃᔅᓱᒧᖓ ᐃᓄᒻᒧᑦ ᐱᖃᑎᖃᐅᓇᓗᐋᑉᐸᖏᑦᑐᒧᑦ ᕿᑐᖓᒻᒥᓂᒃ ᐱᑎᑉᐸᓪᓗᓂᐅᒃ ᐃᓄᒃ ᑕᐃᓐᓇ ᕿᑐᖓᓕᔭᑉᐸᒃᑐᖅ. ᐃᓄᒃ ᑕᐃᓐᓇ ᐊᑭᓕᔅᓱᐃᕙᑦᑐᖅ ᓱᕈᓯᒻᒥᒃ ᐃᑲᔪᕈᑎᓂᒃ ᑕᐃᔭᐅᓲᖑᕗᖅ “ᐊᑭᓖᕙᒃᑐᖅ ᕿᑐᖓᖃᑦᑎ”.
ᑕᐃᒪᓕ ᕿᑐᖓᐃ ᓇᔪᔅᓯᑉᐸᑦ ᑕᒪᒃᑭᖏᓐᓂᒃ ᐊᖓᔪᖄᖏᓐᓂᒃ ᑕᐃᒪᓪᓗᐋᐸᓗᒃ ᐊᑯᓂᐅᑎᒋᔪᖅ ᐱᖃᑎᒋᕙᓪᓗᓂᒋᒃ, ᑕᐃᓐᓇ ᐃᓄᒃ ᑮᓐᓇᐅᔭᔅᓴᓂᔅᓴᖅ ᐊᑭᓖᖃᑎᑕᕆᐊᓕᒃ ᓱᕈᓯᒻᒥᒃ ᐃᑲᔪᕈᑎᓂᒃ.
“ᕿᑐᖓᖃᑦᑎᒃ” ᕿᑐᖏᐅᔅᓯᒪᑐᐃᓐᓇᖏᒻᒪᑎᒃ. ᕿᑐᖓᖃᑎᐅᔪᖅ ᑎᒍᐊᔅᓯᒪᒍᓐᓇᒻᒪᑦ ᕿᑐᖓᖃᑦᑎᐅᓗᓂ, ᐊᒻᒪᓗ ᐃᓛᓂᒃᑯᓪᓘᓐᓂᑦ ᐊᒡᓚᑦ ᐊᖓᔪᖄᔅᓴᕆᓪᓗᓂᒋᒃ. ᒪᓕᒐᑦᑎᒍ ᐃᑲᔪᑦᑎ ᐃᑲᔪᕈᓐᓇᑦᑐᖅ ᐃᓱᒪᓕᐅᕈᑎᖃᕋᓱᐋᑦᑎᓪᓗᑎᒃ ᐊᑭᓖᖃᑦᑕᕆᐊᖃᒻᒪᖔᑉᐱᑦ ᓱᕈᓯᒻᒥᒃ ᐃᑲᔪᕈᑎᒥᒃ.
ᖃᖓᒃᑯᓕ ᑕᐃᒪ ᕿᑐᖓᖃᑦᑎᐅᔪᖅ ᐊᑭᓕᔅᓱᐃᒋᐊᖃᓕᕋᔭᑉᐹ ᓱᕈᓯᒻᒥᒃ ᐃᑲᔪᕈᑎᓃᒃ?
ᐊᕕᑐᐋᕈᔅᓯᒃ ᐊᐃᑉᐸᕆᔭᐃᓪᓗ ᕿᑐᖓᖃᑦᑎᐅᔪᓯᒃ, ᐊᑭᓖᖃᑦᑕᕆᐋᖃᓕᓐᓂᖅ ᐱᒋᐊᓲᖑᒻᒪᑦ ᐊᑭᓕᖃᑦᑕᕆᐊᖃᓕᓪᓗᑎᑦ ᓱᕈᓯᒻᒥᒃ ᐃᑲᔪᕈᑎᒥᒃ ᐱᒋᐊᓪᓗᓂ ᒫᓐᓇᑦᑕᐅᑎᒋ. ᑲᒪᒋᔭᖃᕋᕕᒃ ᐃᑲᔪᕆᐊᖃᑦᑐᒋᑦ ᕿᑐᙵᑎᑦ, ᐊᒡᓛᓪᓗᓂᒃ ᐃᖅᑲᑦᑐᐃᑯᒃᑯᑦ ᑎᓕᔭᐅᔾᔪᑎᑕᖃᖏᒃᑲᓗᐊᑉᐸᑦ. ᑕᐃᒪᓕ ᐊᑭᓕᔅᓱᐃᖁᔨᒍᑎ ᓱᕈᓯᒻᒥᒃ ᐃᑲᔪᕈᑎ ᓴᓇᔭᐅᓐᓂᑉᐸᑦ ᑭᖑᓂᖓᒍᑦ, ᐊᑭᓖᓯᒪᓂᑦᑖᕈᑎᖃᕋᔭᑦᑐᑎᑦ ᑕᐃᒃᑯᓄᖓ ᐊᑭᓖᒍᑎᒋᔭᒥᓂᓐᓄᑦ ᓱᕈᓯᒻᒥᒃ ᐃᑲᔪᕈᑎᓂᒃ ᐃᕝᕕᑦ ᐊᑭᓕᑦᑕᒥᓂᖏᓐᓂᒃ. ᐱᓯᒪᒋᐋᖃᑦᑕᑎᑦ ᓇᓗᓇᐃᔅᓯᒍᑎᑦ ᐊᑭᓖᔪᒥᓂᐅᓂᓐᓄᑦ (ᑐᑭᓕᐅᑎᓗᒍ EMT ᓇᓕᖃᐃᑦ, ᓇᓕᖃᐃᑦ ᐊᑭᓖᔪᒥᓂᐅᓂᓐᓄᑦ ᑮᓇᐅᔭᓪᓚᕆᑦᑎᒍ).
ᑕᐃᒪᓕ ᐊᑭᓕᔅᓱᐃᒋᐊᓕᓂᕈᕕᑦ ᐊᕕᑎᓪᓗᓯᒃ, ᑕᒪᓐᓇᑦᑕᐅᖅ ᑐᑭᖃᒻᒥᒻᒪᑦ ᐊᖏᔪᐋᓗᒻᒥᒃ ᐊᒥᓲᓂᓕᓐᓂᒃ ᐊᑭᓖᒋᐊᑐᔾᔮᙱᓐᓇᕕᒃ ᐊᑭᓕᕆᐊᖃᓕᕋᔭᑦᑐᒥᓂᓐᓂᒃ ᑕᒪᒃᑯᓄᖓ ᓱᕈᓯᒻᒥᒃ ᐃᑲᔪᕈᑎᓄᑦ.
ᐊᒡᓛᓪᓗᓂᑦ ᖃᐅᔨᒪᓂᖏᒃᑲᓗᐋᕈᕕᑦ ᖃᔅᓯᓂᒃ ᐃᑲᔪᕈᑎᓂᒃ ᐊᑭᓖᒍᑎᖃᕆᐊᖃᒻᒪᖔᑉᐱᑦ, ᑕᑯᒋᐊᕋᓴᑐᐃᓐᓇᐃᑦ ᓱᕈᓯᒻᒥᒃ ᐃᑲᔪᕈᑎᓂᒃ ᑎᑎᕋᔅᓯᒪᕕᒋᔪᖅ ᐊᒻᒪᓗ ᓇᓚᐅᑦᑖᑐᐃᓐᓇᓪᓗᒍ ᓇᒻᒪᒍᓇᓛᖑᓂᖓ.
ᐅᓇ ᐊᑐᕈᓐᓇᑦᑕᐃᑦ ᖃᕋᑕᐅᔭᒃᑯᑦ ᐱᓕᕆᔾᔪᑎ ᖃᐅᔨᖁᓪᓗᑎᑦ ᖃᔅᓯᓂᒃ ᓱᕈᓯᒻᒥᒃ ᐃᑲᔪᕈᑎᓂᒃ ᐊᑭᓕᔅᓱᐃᒋᐋᖃᒻᒪᖔᑉᐱᑦ ᑮᓐᓇᐅᔭᒃᓴᕆᔭᐃᑦ ᒪᓕᓪᓗᒍ: https://www.justice.gc.ca/eng/fl-df/child-enfant/2017/look-rech.aspx
ᖃᔅᓯᓂᒃ ᓱᕈᓯᒻᒧᑦ ᐃᑲᔪᕈᑎᒥᒃ ᐊᑭᓕᔅᓱᐃᓂᐋᑉᐳᖔ?
ᐅᓄᓂᖓ ᓱᕈᓯᒻᒥᒃ ᐃᑲᔪᕈᑎᐅᒃ ᐊᑭᓕᑦᑕᐅᒋᐋᓕᐅᑉ ᐋᖅᑭᑕᐅᓲᖑᒻᒪᑦ ᒐᕙᒪᒃᑯᓂᒃ. ᒐᕙᒪᒃᑯᑦ ᒪᓕᑦᑕᐅᒋᐋᖃᑦᑎᑦᑎᓲᖑᒻᒪᑕ ᐅᖃᐅᔾᔨᔪᓂᒃ ᖃᔅᓯᓂᒃ ᐊᑭᓕᑦᑕᐅᒋᐋᖃᒻᒪᖔᑕ ᓱᕈᓯᒻᒥᒃ ᐃᑲᔪᕈᑏᑦ. ᑖᓐᓇ ᑕᐃᔭᐅᓲᖑᒪᑦ “ᐊᑭᓕᐅᑎᒋᔭᐅᒋᐋᓕᑦ ᐊᑐᑦᑕᐅᒋᐋᖃᑦᑐᑦ”. ᐅᓄᓂᖓ ᑐᙵᕕᖃᑦᑎᑕᐅᓲᒍᕗᖅ ᐆᒥᖓ:
• ᓇᔪᑦᑕᖓᓂᒃ ᐊᑭᓖᕙᒃᑑᑉ ᕿᑐᖓᖃᑦᑎᐅᔪᑉ
• ᖃᔅᓯᓂᒃ ᐊᑭᓕᕙᒃᑐᖅ ᕿᑐᖓᖃᑦᑎᐅᔪᖅ ᑮᓐᓇᐅᔭᔅᓴᓂᖃᓂᖓᓂᒃ
• ᖃᔅᓯᐅᓂᖏᑦ ᕿᑐᖓᖏᑖ ᐅᓄᓂᖏᑦ
ᑕᒪᐃᑎᒍᑦ, ᐃᓄᒃ ᑮᓐᓇᐅᔭᔅᓴᑎᐋᓂᔅᓴᐅᑉᐸᑦ, ᐊᒻᒪᓗ ᐅᓄᓂᔅᓴᐅᐸᑕ ᕿᑐᖓᕆᔭᐅᒧᑦ ᑖᒃᑯᓇᙵᑦ, ᐊᒥᓲᓂᔅᓴᓂᒃ ᐊᑭᓖᖃᑦᑕᕆᐊᖃᑦᑎᑕᐅᓲᑦ ᓱᕈᒥᒻᒥᒃ ᐃᑲᔪᕈᑎᓂᒃ.
ᐅᓇ ᐊᑐᕈᓐᓇᑦᑕᐃᑦ ᖃᕋᑕᐅᔭᒃᑯᑦ ᐱᓕᕆᔾᔪᑎ ᖃᐅᔨᒍᑎᒋᒍᓐᓇᕋᕕᐅᒃ ᖃᔅᓯᓂᒃ ᓱᕈᓯᒻᒥᒃ ᐃᑲᔪᕈᑎᓂᒃ ᐱᖃᑦᑕᕆᐋᖃᒻᒪᖔᑉᐱᑦ: https://www.justice.gc.ca/eng/fl-df/child-enfant/2017/look-rech.aspx
ᖃᓄᓕᑭᐊᖅ ᖃᐅᔨᒪᓂᖏᒃᑯᒪ ᖃᔅᓯᓕᐅᕋᓗᐋᒻᒪᖔᑦ ᐊᑭᓖᒋᐊᖃᑦᑐᖅ ᕿᑐᖓᖃᑦᑎᐅᔫᑉ ᑮᓐᓇᐅᔭᒃᓴᓂᖓᓃᒃ?
ᐊᑭᓖᕙᒃᑐᖅ ᕿᑐᖓᖃᑦᑎᐅᔪᖅ ᖃᐅᔨᔭᐅᑎᑦᑎᒋᐋᓕᒃ ᐊᒻᒪᓗ ᐅᖃᐅᑎᓗᓂᑎᑦ ᖃᔅᓯᓂᒃ ᑮᓇᐅᔭᑦᑖᔅᓯᒪᓕᒪᖔᒻᒥᒃ ᐊᑐᓚᐅᑦᑐᓂ ᐱᖓᓱᓂ ᐊᕐᕌᒍᓚᐅᑦᑐᓂ. ᑕᐃᒪᓕ ᐊᑭᓖᕙᒃᑐᖅ ᐱᔭᐅᑎᑦᑎᓂᖏᑉᐸᑦ ᑕᒪᒃᑯᓂᖓ ᑐᓴᐅᒪᔾᔪᑎᓴᓂᒃ, ᐃᖅᑲᑦᑐᐃᕕᒻᒧᑦ ᑐᓂᓯᖁᔭᐅᒍᓐᓇᑦᑐᖅ ᖃᔅᓯᓕᐅᑐᒥᓂᐅᒻᒪᖔᒻᒥ.
ᐃᖅᑲᑦᑐᐃᑯᒃ ᐅᖃᐅᑎᒋᔭᐅᖁᔨᒍᓐᓇᒻᒥᔪᖅ ᐃᓅᑉ ᐃᖅᑲᓇᐃᔭᕕᖓᓄᑦ ᑐᓴᑦᑎᑕᐅᖁᓗᒍ ᐃᖅᑲᑦᑐᐃᑯᒃ ᖃᔅᓯᓕᐅᓲᖑᒻᒪᑕ ᐃᓄᒃ ᑮᓐᓇᐅᔭᒃᓵᖏᓐᓂᒃ.
ᑕᐃᒪᓕ ᖃᐅᔨᒪᓂᖏᒃᑯᕕᐅᒃ ᑭᒃᑯᓄᑦ ᐃᖅᑲᓇᐃᔭᓲᖑᒐᓗᐊᒻᒪᖔᑦ ᐊᒻᒪᓗ ᐅᖃᐅᑎᓯᒪᖏᓪᓗᓂᑎᑦ ᑮᓐᓇᐅᔭᔅᓴᓂᒻᒥᓂᒃ, ᐃᖅᑲᑦᑐᐃᑯᒃ ᐋᖅᑭᔅᓯᖁᒍᓐᓇᑦᑕᐃᑦ ᐱᔾᔪᑎᔅᓴᖃᑦᑎᐋᑦᑐᒥᒃ ᑮᓐᓇᐅᔭᔅᓴᓂᕆᒍᓐᓇᑦᑕᖓᓂᒃ. ᐱᔭᐅᑎᑦᑎᒋᐊᖃᕋᔭᑦᑐᑎᑦ ᐱᔾᔪᑎᔅᓴᖃᑦᑎᐊᑦᑐᒥᒃ ᓱᒻᒪᑦ ᑕᐃᒪᓐᓇ ᐃᓱᒪᒋᒻᒪᖔᑉᐱᐅᒃ ᐅᓄᓐᓂᖓ ᓈᒻᒪᑦᑐᕆᓗᒍ. ᑕᒪᓐᓇ ᑕᐃᔭᐅᓲᖑᒻᒪᑦ “ᑭᒡᒐᑦᑐᐃᔪᖅ ᑮᓐᓇᐅᔭᔅᓴᓂᒻᒥᒃ”. ᓱᕈᓯᒻᒧᑦ ᐃᑲᔪᕈᑎ ᑐᙵᕕᖃᑦᑎᑕᐅᓂᐋᓕᑦᑐᖅ ᐆᒥᖓ ᓈᓴᐅᑎᖃᑦᑎᑕᐅᖔᕈᑎᒥᒃ.
ᖃᓄᐃᓕᒐᔭᑉᐳᖓᓖ ᐊᑭᓖᒍᓐᓇᓂᖏᒃᑯᒫ ᐊᑭᓕᐅᑎᒋᐋᓕᑦ ᐊᑐᑦᑕᐅᒋᐋᖃᑦᑐᑦ ᕿᑐᖓᒥᒃ ᐃᑲᔪᕈᑎᒨᑉ?
ᐃᖅᑲᑦᑐᐃᔨ ᑎᓕᓯᒍᑎᓕᐅᕈᓐᓇᑦᑐᖅ ᐊᑭᓖᒋᐊᖃᑦᑎᓪᓗᓂᑎᑦ ᖃᔅᓰᓐᓇᐅᓂᔅᓴᓂᒃ ᐊᑭᓕᐅᑎᒋᔭᐅᒋᐋᓕᑦ ᐊᑐᑦᑕᐅᒋᐋᖃᑦᑐᑦ ᐅᓄᓂᕆᔭᐅᔪᓃᒃ. ᐱᒐᓱᒋᐋᖃᓂᐋᑦᑐᑎᑦ ᐊᔅᓱᕈᓇᓗᐊᓂᖓᓄᑦ ᐊᑭᓕᑦᑕᐅᒍᒪᒍᑎᖓᓂᒃ, ᑕᒪᓐᓇᓗ ᐊᔅᓱᐋᓗᒃ ᐊᔪᓐᓇᑲᓇᑦᑐᓂ ᐊᒻᒪᓗ ᐱᔭᐅᒐᓱᒐᔪᐃᑦᑐᓂ. ᖃᐅᔨᔭᐅᑎᑦᑎᒋᐊᖃᕋᔭᑦᑐᑎᑦ ᑕᒪᓐᓇ ᐅᓄᓐᓂᖓ ᐃᑲᔪᕈᑎ ᐊᑭᓕᕆᐋᖃᑦᑕᐃᑦ “ᐅᖓᑖᓂᓗᐊᓂᖓᓂᒃ, ᐊᑭᓖᙱᑎᑕᐅᒍᓐᓇᕆᐊᓕᒃ, ᐅᕝᕙᓘᓐᓃᑦ ᓈᒪᙱᓗᐊᑦᑐᖅ” ᐊᒻᒪᓗ ᐊᑲᐅᙱᓕᐅᑦᑎᑦᑎᓂᐅᓴᓪᓗᓂ ᐃᓕᓐᓄᑦ ᐊᑭᓕᕋᓱᒃᑲᓗᐋᕈᕕᐅᒃ. ᑕᐃᒪᓕ ᐱᒐᓱᒍᒪᓐᓂᕈᕕᑦ ᐊᔅᓱᕈᓐᓇᓗᐋᓂᖓᓄᑦ ᐊᑭᓕᑦᑕᐅᒍᒪᒍᑎᒥᒃ, ᐅᖃᓪᓚᖃᑎᖃᖁᔨᕗᒍᑦ ᒪᓕᒐᑦᑎᒍ ᐃᑲᔪᑦᑎᒥᒃ.
ᐊᓯᐋ ᐱᖃᑎᒋᔭᖓ ᐱᓂᐋᑉᐸᑦ ᕿᑐᖓᒧᑦ ᑖᔅᓯᔭᕈᑎᓂᒃ ᐃᑲᔪᑦᑕᐅᒍᑎᓂᒃ. ᓱᓖ ᐊᑭᓖᒋᐊᖃᕋᔭᑉᐳᖔ ᕿᑐᖓᓐᓄᑦ ᐃᑲᔪᕈᑎᒦᒃ?
ᐄ. ᐊᑭᓕᒋᐊᖃᕋᔭᑦᑐᑎᑦ ᓱᓕ ᕿᑐᖓᓐᓂᒃ ᐃᑲᔪᕈᑎᒥᒃ ᐊᒡᓛᑦ ᐊᓯᑦ ᐱᖃᑎᑦ ᐱᒐᓱᐊᑉᐸᑦ ᕿᑐᖓᓐᓄᑦ ᑖᔅᓯᔭᕈᑎᓂᒃ ᐃᑲᔪᑦᑕᐅᒍᑎᓂᒃ.
ᐱᒍᓐᓇᑉᐳᖔ ᕿᑐᖓᓄᑦ ᐃᑲᔪᑕᐅᒍᑎᓂᒃ ᐃᑲᔪᑦᑕᐅᖁᓪᓗᖓ ᐊᑭᓕᓪᓗᒋᑦ ᐊᓯᒃᑲᓂᖏᑦ ᐊᑭᓕᔅᓱᕆᐋᖃᒃᑲᓐᓂᑦᑑᑦ?
ᐊᓯᒃᑲᑯᓂᖏᑦ ᐊᑭᓕᔅᓱᕆᐋᖃᒃᑲᓐᓂᑦᑐᑦ ᕿᑐᖓᓐᓄᑦ, ᓲᓪᓗ ᐱᓕᐅᑎᓂᒻᒨᖓᔪᑦ, ᐸᐃᕆᕕᓐᓄᑦ, ᐃᓕᓐᓂᐊᕕᒻᒥ ᐊᐅᓪᓚᑦᑐᓄᑦ, ᐅᕝᕙᓘᓐᓃᑦ ᐃᓅᓕᓴᐅᑎᑦ ᐊᑭᖏᓐᓂᒃ. ᑕᐃᔭᐅᓲᖑᒪᑕ ᑕᒪᒃᑯᐊ “ᐊᔾᔨᐅᖏᑦᑐᒃᑯᑦ ᐅᕝᕙᓘᓐᓃᑦ ᐱᑐᐃᓐᓇᐅᖏᑦᑐᒃᑯᑦ ᐊᑭᓕᔅᓱᕆᐋᓕᒃ”.
ᐊᑭᓕᔅᓱᐃᖃᑎᖃᕈᓐᓇᑐᐃᓐᓇᕆᐊᖃᑦᑐᑎᑦ ᑕᒪᒃᑯᓂᖓ ᐊᑭᓕᔅᓱᕆᐋᓕᓐᓂᒃ ᐊᓯᓐᓂᒃ ᐱᖃᑎᓐᓂᒃ ᑲᒪᑦᑎᐋᑐᐊᑉᐸᑕ (ᑐᑭᓕᐅᑎᓗᒍ ᑕᒪᒃᑮᒃ ᕿᑐᖓᖃᑦᑎᐅᔫᒃ ᐊᑭᓕᔅᓱᐃᔪᐃᓇᐅᒍᓐᓇᑐᐊᑉᐸᑎᒃ ᑕᒪᑐᒥᖓ), ᐊᒻᒪᓗ ᐊᑭᓖᓂᖅ ᐊᑭᖓᓂᒃ ᓱᕈᓯᐅᑉ ᐱᒋᐊᖃᓂᐹᒐᓅᖓᒻᒪᑦ ᐱᐅᓚᓄᑦ.
ᐊᑭᖏᑦ ᐊᑭᓕᔅᓱᐃᖃᑎᒌᒍᑎᒋᔭᐅᒐᔪᑉᐳᑦ ᕿᑐᖓᖃᑦᑎᐅᔫᓐᓄᒃ ᑐᙵᕕᖃᓪᓗᑎᒃ ᑮᓐᓇᐅᔭᒃᓵᕆᔭᖏᓐᓂᒃ. ᑐᑭᓕᐅᑎᓗᒍ, ᑕᐃᒪᓕ ᑮᓐᓇᐅᔭᔅᓴᓂᔅᓴᐅᒍᕕᑦ ᐊᑭᓕᔅᓱᐃᔪᒥᒃ ᕿᑐᖓᖃᑦᑎᐅᔪᒥᒃ, ᐊᑭᓖᖃᑦᑕᕆᐊᖃᑦᑎᑕᐅᒍᓐᓇᑦᑐᑎᑦ ᐊᖏᓂᔅᓴᒥᒃ ᐃᓚᖓᓂᒃ ᐊᑭᓕᔅᓱᕆᐋᓕᑦ.
ᖃᓄᓪᓕ ᑐᔅᓯᕋᐅᑎᓕᕈᓐᓇᑉᐳᖔ ᕿᑐᖓᓄᑦ ᐃᑲᔪᑦᑕᐅᒍᑎᖃᕈᒪᓗᖔ?
ᐱᒍᓐᓇᑦᑐᑎᑦ ᕿᑐᖓᓐᓄᑦ ᐃᑲᔪᑦᑕᐅᒍᑎᒥᒃ ᐊᑎᓕᐅᓪᓗᑎᓪᓘᓐᓂᑦ ᐊᖏᖃᑎᒋᒍᑎᒥᒃ ᐊᓯᓂᒃ ᐱᖃᑎᓂᒃ, ᐅᕝᕙᓘᓐᓃᑦ ᑐᔅᓯᕋᐅᑎᓕᐅᓪᓗᑎᑦ ᐃᖅᑲᑦᑐᐃᕕᒃᑯᑦ ᐊᑭᓕᔅᓱᐃᖁᔨᒍᑎᒥᒃ. ᒪᓕᒐᑦᑎᒍ ᐃᑲᔪᑦᑎᒧᑦ ᐃᑲᔪᑦᑕᐅᒍᓐᓇᑦᑐᑎᑦ ᑎᑎᕋᑦᑎᓪᓗᑎᑦ ᐊᖏᖃᑎᒌᒍᑎᒥᒃ, ᐅᕝᕙᓘᓐᓃᑦ ᐃᑲᔪᕈᓐᓇᒥᔪᑦ ᐱᒋᐊᑦᑎᑦᑎᑎᓪᓗᑎᑦ ᐃᖅᑲᑦᑐᐃᕕᒃᑯᑦ ᑐᔅᓯᕋᐅᑎᒥᒃ. ᑕᐃᒪᓕ ᐱᒍᓐᓇᑦᑎᑕᐅᒐᔭᕈᕕᑦ, ᓄᓇᕗᑦ ᒪᓕᒐᓕᕆᔨᑦ ᒪᓕᒐᑦᑎᒍ ᐃᑲᔪᑎᑖᑦᑎᑦᑎᒍᓐᓇᒻᒪᑕ ᐃᑲᔪᑦᑕᐅᖁᓪᓗᑎᑦ ᑐᔅᓯᕋᐅᑎᓕᐅᑦᑎᓪᓗᑎᑦ ᕿᑐᖓᓐᓄᑦ ᐃᑲᔪᑦᑕᐅᒍᑎᒥᒃ.
ᖃᓄᓪᓕ ᐊᑭᓕᔅᓱᐃᖃᑦᑕᓂᐊᕋᒫ ᕿᑐᖓᒻᒦᒃ ᐃᑲᔪᕈᑎᓐᓃᒃ?
ᐱᕕᔅᓴᐅᒻᒪᑦ ᓇᓖᕋᕕᔅᓴᐅᔪᓐᓂᒃ ᒪᕐᕉᓂᒃ − ᓇᒻᒥᓂᓪᓘᓐᓂᑦ ᐊᑭᓕᖃᑦᑕᕈᓐᓇᑦᑕᐃᑦ ᕿᑐᙵᖃᖃᑎᑦ, ᓲᕐᓗ ᐊᑐᓪᓗᑎᑦ EMT, ᐅᕝᕙᓘᓐᓃᑦ ᐊᑎᓕᐅᕆᐊᑐᕈᓐᓇᑦᑐᑎᑦ ᐃᓚᒋᓂ ᐃᑲᔪᕕᒃ ᐊᒡᓚᒡᕕᒻᒧᑦ.
ᓇᓪᓕᑐᐃᓐᓇᓯ ᐊᑎᓕᐅᕈᓐᓇᑦᑐᖅ ᐃᓚᒋᓂ ᐃᑲᔪᕕᒃ ᐊᒡᓚᒡᕕᖓᓄᑦ (FSO). ᐃᓚᒋᓂ ᐃᑲᔪᕕᒃ ᐊᒡᓚᒡᕕᖓ ᐱᖃᑦᑕᕋᔭᒻᒪᑦ ᑮᓇᐅᔭᓂᒃ ᐊᑭᓕᔅᓱᐃᔪᒥᒃ ᕿᑐᖓᖃᑦᑎᒥᒃ, ᐃᕝᕕᓪᓘᓂᑦ ᓯᒃᑭᑖᖓᓂᒃ ᐊᑭᓕᑦᑕᐅᒍᑎᓐᓂᒃ ᐅᕝᕙᓘᓐᓃᑦ ᐃᓄᓕᕆᔨᒍᑎᓐᓂᒃ ᑮᓇᐅᔭᒃᑯᕕᒻᒨᑦᑕᐅᔪᓂᒃ, ᐊᒻᒪᓗ ᑐᔫᑎᒋᔭᐅᓕᒻᒥᓗᑎᒃ ᐊᓯᓐᓄᑦ ᕿᑐᖓᖃᑦᑎᐅᖃᑎᓐᓄᑦ. ᐃᓚᒋᓂ ᐃᑲᔪᕕᒃ ᐊᒡᓚᒡᕕᖓ ᐱᖃᑦᑕᕈᓐᓇᒻᒥᔪᖅ ᑮᓇᐅᔭᓂᒃ ᐊᑭᓕᔅᓱᐃᕙᑦᑐᒥᒃ ᕿᑐᖓᖃᑦᑎᐅᔪᑉ ᐅᑎᑦᑐᔅᓴᖏᓐᓂᒃ ᑮᓇᐅᔭᑦᑖᖏᓂᒃ ᐊᑭᓕᔅᓴᖃᑉᐸᑕ ᕿᑐᖓᒧᑦ ᐃᑲᔪᕈᑎᓄᑦ ᐊᒻᒪᓗ ᐊᑭᓖᓇᓵᓗᐊᓕᓪᓗᑎᒃ ᐊᑭᓕᕆᐊᖃᑦᑕᖏᓐᓂᒃ. ᑐᓴᐅᒪᔾᔪᑎᔅᓴᒃᑲᓐᓃᑦ ᑕᒪᒃᑯᓂᖓ ᐃᓚᒋᓂ ᐃᑲᔪᕕᒃ ᐊᒡᓚᒡᕕᖓᓂᑦ ᐱᔭᐅᒍᓐᓇᑉᐳᑦ ᐅᕙᖓᑦ: https://nupli.ca/index.php/familysupport-2
ᐊᑭᓖᖃᑦᑕᕈᓐᓇᑉᐳᖔ ᕿᑐᖓᓐᓄᑦ ᑐᓂᓗᒎ?
ᐋᒃᑲ. ᐊᑭᓕᖃᑦᑕᕈᓐᓇᑦᑐᑎᑦ ᐊᓯᓐᓂᒃ ᐱᖃᑎᓐᓂᒃ ᑖᔅᓱᒧᖓᑦᑕᐅᑎᒋ ᐃᖅᑲᒃᑐᐃᕕᒻᒧᑦ ᐅᖃᐅᑎᔭᐅᓯᒪᖏᑐᐋᕈᕕᑦ ᐊᔾᔨᒋᙱᑕᖓᓂᒃ ᐊᑐᖁᔭᐅᓗᑎᑦ. ᑕᐃᒪᓕ ᐃᓱᒫᓗᑎᖃᕈᕕᑦ ᐊᓯᓐᓂᒃ ᐱᖃᑎᒋᔭᓐᓂᒃ ᐊᑐᖃᑦᑕᑦᑐᕆᓗᒍ ᕿᑐᖓᒻᒥᒃ ᐃᑲᔪᕈᑎᒥᒃ ᐊᑐᕆᐊᖃᖏᑕᖓᒍᑦ, ᐅᖃᓪᓚᖃᑎᖃᖁᔨᕗᒍᑦ ᒪᓕᒐᑦᑎᒍ ᐃᑲᔪᑦᑎᒥᒃ.
ᑕᐃᒪᓕ ᐊᑭᓖᖃᑦᑕᕈᓐᓃᕈᒪ ᕿᑐᖓᒻᒥᒃ ᐃᑲᔪᕈᑎᒥᒃ, ᓱᓖ ᑕᑯᖃᑦᑕᕈᓐᓇᕋᔭᑉᐸᕌ ᕿᑐᖓᕌ?
ᕿᑐᖓᖃᑦᑎᐅᔪᖅ ᓄᖃᑦᑎᑕᐅᒍᓐᓇᖏᒻᒪᑕ ᑕᑯᖃᑦᑕᓂᒻᒥᒃ ᕿᑐᖓᖓᓂᒃ ᐱᔾᔪᑎᒋᓗᒍ ᐊᑭᓖᖃᑦᑕᕈᓐᓃᓐᓂᖓ ᕿᑐᖓᒥᓄᑦ ᐃᑲᔫᒥᒃ. ᑕᐃᒪᓕ ᑕᐃᒪᓐᓇᐃᓘᑦᑕᐅᒍᕕᑦ, ᑐᔅᓯᕋᐅᑎᓕᐅᖁᔨᕗᒍᑦ ᒪᓕᒐᑦᑎᒍ ᐃᑲᔪᑦᑕᐅᕕᒻᒧᑦ ᐅᖃᓪᓚᖃᑎᖃᓗᑎᓪᓗ ᒪᓕᒐᑦᑎᒍ ᐃᑲᔪᑦᑎᒥᒃ.
ᑕᑯᖃᑦᑕᖏᓐᓇᒃᑯᑦ ᕿᑐᖓᕋ, ᓱᓖ ᐊᑭᓕᔅᓱᐃᒋᐋᖃᑉᐳᖔ ᕿᑐᖓᓂᒃ ᐃᑲᔪᕈᑎᒦᒃ?
ᐄ. ᕿᑐᖓᒻᒥᒃ ᐃᑲᔪᕈᑎ ᐱᒍᓐᓇᐅᑎᒋᔭᐅᒻᒪᑦ ᕿᑐᖓᕆᔭᐅᔪᒧᑦ, ᑐᑭᖃᑦᑐᓂ ᕿᑐᖓᐃᑦ ᐱᒍᓐᓇᑦᑎᑕᐅᒻᒪᑦ ᐱᖃᑦᑕᓂᐋᓪᓗᓂ ᐱᓯᒪᖃᑦᑕᕈᕕᐅᓪᓘᓐᓂᑦ ᐅᕝᕙᓘᓐᓃᑦ ᑕᐃᒫᖑᖃᑦᑕᖏᒃᑲᓗᐊᑉᐸᑦ.
ᖃᓄᑎᒋ ᐊᑯᓂᐅᑎᒋᔪᖅ ᐊᑭᓕᔅᓱᐃᒋᐋᖃᕋᓛ ᕿᑐᖓᓐᓃᒃ ᐃᑲᔪᕈᑎᒦᒃ?
ᕿᑐᖓᒥᒃ ᐃᑲᔪᕈᑎ ᐊᑭᓕᑦᑕᐅᖃᑦᑕᕆᐋᓕᒃ ᕿᑐᖓᕆᔭᐅᔪᖅ ᐸᖅᑭᔭᐅᒋᐋᖃᓂᓕᒫᖓᓂ. ᐃᒪᓐᓇᐅᒐᔪᓱᖅ, ᑕᒪᓐᓇ ᑐᑭᖃᒻᒪᑦ ᑎᑭᐅᑎᒐᓱᐋᓂᖏᓐᓂᒃ 19−ᓂᒃ ᐊᕐᕌᒍᖃᓕᕋᓱᐋᓂᖓᓄᑦ ᐅᑭᐅᖃᓕᓪᓗᓂ, ᑭᓯᐊᓂ ᕿᑐᖓᐃᑦ ᑲᑎᑎᑕᐅᑉᐸᑦ ᓯᕗᓂᖓᒍᑦ ᑕᐃᒪᓇᑎᒋ ᐅᑭᐅᖃᓕᓚᐅᖏᓂᖓᓂ, ᐱᓯᒪᔭᐅᒋᐋᑐᒍᓐᓃᒻᒪᑕ.
ᐃᓛᓐᓂᒃᑯᑦ ᕿᑐᖓᕆᔭᐅᔪᑦ ᐅᖓᑖᓂ 19−ᓃᓕᑦᑐᑦ ᓱᓕ ᐸᖅᑭᔭᐅᒋᐋᖃᓲᖑᒻᒪᑕ. ᑕᒪᓐᓇ ᐃᒪᓐᓇᐅᒍᓐᓇᒻᒪᑦ ᐊᔪᕈᑎᖃᑉᐸᑕ ᐅᕝᕙᓘᓐᓃᑦ ᖃᓂᒻᒪᓯᖃᑉᐸᑕ, ᐅᕝᕙᓘᓐᓃᑦ ᓱᓕ ᐃᓕᓐᓂᐊᕆᐋᖃᑦᑕᑉᐸᑕ.
ᐱᓚᐅᔅᓯᒪᒐᒪ ᕿᑐᖓᓐᓄᑦ ᐃᑲᔪᑦᑕᐅᒍᑎᒥᒃ ᒪᓕᑕᐅᖁᔭᐅᒧᒥᒃ ᐅᐋᑦᑎᐋᕈᐋᓗᒃ, ᐊᓯᕈᕈᓐᓇᑉᐸᕌ?
ᐃᓚᖏᓐᓂ ᐊᑐᑦᑕᐅᔪᓂ, ᕿᑐᖓᒻᒥᒃ ᐃᑲᔪᕈᑎᑦ ᓈᓴᐅᓯᕆᐊᕆᔭᐅᒃᑲᓂᕈᓐᓇᒻᒥᔪᑦ. ᑕᒪᓐᓇ ᐊᑐᑦᑕᐅᒍᓐᓇᑦᑐᖅ ᐊᑭᓕᔅᓱᐃᕙᑦᑐᖅ ᕿᑐᖓᖃᑦᑎ ᐅᓄᓂᔅᓴᓂᒃ ᐅᕝᕙᓘᓐᓃᑦ ᖃᔅᓰᓐᓇᓂᔅᓴᐅᓕᑉᐸᑕ ᑮᓇᐅᓕᐊᕆᖃᑦᑕᓚᐅᑦᑕᖏᓐᓂᒃ ᑕᐃᔅᓱᒪᓂ ᐊᑭᓖᖃᑦᑕᖁᔨᒍᑎ ᐋᖅᑭᑦᑕᐅᓚᐅᔅᓯᒪᓂᖓᓂᒃ. ᑕᐃᒪᓐᓇᒍᓐᓇᒻᒥᔪᑦᑕᐅᖅ ᐊᒥᓱᐋᓗᓂᒃ ᕿᑐᖓᖃᕈᕕᑦ, ᐊᒻᒪᓗ ᐃᓚᖓᑦ ᐅᕝᕙᓘᓐᓃᑦ ᐊᒥᓲᓂᔅᓴᐃᑦ ᑖᒃᑯᓇᓂ ᓱᕈᓯᓐᓂ ᐸᖅᑭᔭᐅᒋᐋᑐᒍᓐᓃᑦᑐᖃᔅᓯᒪᓕᑉᐸᑦ.
ᑕᐃᒪᓕ ᓈᓴᐅᓯᕆᐊᕆᔭᐅᒃᑯᓂᖁᒍᕕᒋᑦ ᕿᑐᖓᓐᓄᑦ ᐃᑲᔪᑦᑕᐅᒍᑎᑦ, ᐃᖅᑲᑦᑐᐃᕕᒻᒨᑲᓂᕆᐊᖃᕋᔭᑦᑐᑎᑦ ᐱᒐᓱᐋᓪᓗᑎᑦ ᓄᑖᒥᒃ ᐊᑭᓕᔅᓱᐃᓂᕆᔭᐅᖁᔭᐅᔪᒥᒃ. ᑐᔅᓯᕋᐅᑎᓕᐅᕈᓐᓇᑦᑐᑎᑦ ᒪᓕᒐᑦᑎᒍ ᐃᑲᔪᑦᑕᐅᒍᒪᕕᒻᒥᒃ ᒪᓕᒐᑦᑎᒍ ᐃᑲᔪᑦᑎᒧᑦ ᐃᑲᔪᑦᑕᐅᖁᓗᑎᑦ.
ᐊᕕᑦᑎᓚᐅᕋᒪᒃ ᐊᓯᓐᓂᒃ ᐱᖃᑎᒋᔭᓐᓂᒃ ᐅᐋᑦᑎᐋᕈᑲᓚᐅᓕᑦᑐᖅ, ᐊᒻᒪᓗ ᐊᑭᓖᓚᐅᔅᓯᒪᖏᒻᒪᑦ ᕿᑐᖓᒻᒥᒃ ᐃᑲᔪᕈᑎᒥᒃ. ᐊᑭᓖᑎᒍᓐᓇᑉᐸᒃᑳ ᕿᑐᖓᓐᓃᒃ ᐃᑲᔪᕈᑎᓃᒃ ᑕᒪᒃᑯᓄᖔ ᐊᕐᕌᒍᓅᑦ?
ᐊᔪᓐᓇᖏᑐᐃᓐᓇᕆᐋᓕᒃ ᐃᖅᑲᑦᑐᐃᕕᒃ ᐱᔭᐅᑎᑦᑎᖁᔨᖁᓗᒍ ᕿᑐᖓᒻᒥᒃ ᐃᑲᔪᕈᑎᓂᒃ ᑕᒪᒃᑯᓄᖓ ᐊᕐᕌᒍᓄᑦ ᑕᐃᒃᑯᓄᖓ ᕿᑐᖓᖃᑦᑎᐅᔪᓄᑦ ᐊᑭᓕᑦᑕᐅᓐᓂᖏᑦᑐᓂᒃ ᓇᓪᓕᑐᐃᓐᓇᖏᓐᓂᒃ ᐃᑲᔪᕈᑎᓂᒃ. ᑕᒪᓐᓇ ᑕᐃᔭᐅᓲᖑᒻᒪᑦ “ᐊᑐᓕᕆᐋᕐᕕᒋᓚᐅᖅᓯᒪᔭᖓᓂᑦ ᕿᑐᖓᒻᒥᒃ ᐃᑲᔪᕈᑎᐅᑉ”.
ᐅᑕᖅᑭᑦᑕᐃᓕᒋᑦ ᐃᓱᒪᓕᐅᕈᑎᖃᕋᓱᐋᓪᓗᑎᒃ ᑐᔅᓯᕋᕈᒪᒻᒪᖔᑉᐱᑦ ᕿᑐᖓᒧᑦ ᐃᑲᔪᑦᑕᐅᒍᒪᒍᑎᒥᒃ! ᒪᓕᒐᑦᑎᒍ ᐃᑲᔪᑦᑎᐅᑉ ᐃᑲᔪᕈᓐᓇᕌᑎᑦ ᐃᓱᒪᓕᐅᕈᑎᖃᓐᓂᒻᒥᒃ ᑐᔅᓯᕋᐅᑎᓕᐅᕆᐋᖃᒻᒪᖔᑉᐱᑦ ᐊᑐᓕᕆᐋᕐᕕᒋᓚᐅᖅᓯᒪᔭᖓᓂᑦ ᕿᑐᖓᒥᒃ, ᐊᒻᒪᓗ ᐅᖃᐅᔾᔨᒋᐋᕈᓐᓇᓐᓂᐋᑦᑐᓂ ᐱᒍᓐᓇᑦᑎᑕᐅᓂᐋᒻᒪᖔᑉᐱᑦ ᐊᑐᓕᕆᐋᕐᕕᒋᓚᐅᖅᓯᒪᔭᖓᓂᑦ ᕿᑐᖓᓄᑦ ᐃᑲᔪᑦᑕᐅᒍᑎᖃᕈᓐᓇᒻᒪᖔᑉᐱᑦ.
ᐃᖅᑲᑦᑐᐃᕕᒃ ᐃᓱᒪᓕᐅᕈᑎᖃᓂᐋᑦᑐᖅ ᐱᒋᐊᖃᒪᖔᑉᐱᑦ ᐊᑐᓕᕆᐋᕐᕕᒋᓚᐅᖅᓯᒪᔭᖓᓂᑦ ᐃᑲᔪᑦᑕᐅᒍᑎᓂᒃ ᐃᓱᒪᔅᓴᔅᓯᐅᕈᑎᒋᔭᐅᓗᑎᒃ:
• ᓱᒻᒪᑦ ᑐᔅᓯᕋᒻᒪᖔᑉᐱᑦ ᐃᑲᔪᑦᑕᐅᒍᒪᓗᑎᑦ
• ᖃᓄᖅ ᕿᑐᙵᖃᑦᑎᐅᔪᑦ ᐃᓕᖅᑯᓯᖃᔅᓯᒪᒻᒪᖔᑦ
• ᖃᓄᖅ ᕿᑐᙵᐃᑦ ᐊᑦᑐᑦᑕᐅᓯᒪᓂᖃᒻᒪᖔᑦ
ᐃᒪᓐᓇᐃᓲᖑᒻᒪᑕ, ᐃᖅᑲᑦᑐᐃᕕᒃ ᐅᑎᕆᐋᕋᔭᒻᒪᑦ ᐱᖓᓱᓄᑦ (3) ᐊᕐᕌᒍᓄᑦ ᐱᒋᐊᓪᓗᓂ ᐅᓪᓗᖓᓂᑦ ᑕᐃᔅᓱᒧᖓ ᑐᔅᓯᕋᓚᐅᓂᓐᓄᑦ ᕿᑐᖓᓐᓂᒃ ᐃᑲᔪᑦᑕᐅᒍᑎᖃᕈᒪᓗᑎᑦ. ᐊᔪᓐᓇᖏᑐᐃᓐᓇᕆᐋᓕᒃ ᐅᑎᕆᐊᕈᓐᓇᓪᓗᓂ ᐅᖓᑖᓄᓂᔅᓴᖅ ᓇᓗᓇᖏᑉᐸᑦ ᖃᓄᐃᓘᓂᕆᔭᐅᔪᓂ.
ᐊᑐᓕᕆᐋᕐᕕᒋᓚᐅᖅᓯᒪᔭᖓᓂᑦ ᕿᑐᖓᒻᒥᒃ ᐃᑲᔪᑦᑕᐅᖑᑎ ᐊᑭᓕᑦᑕᐅᒍᓐᓇᒻᒥᔪᖅ ᐊᑭᓕᑦᑕᐅᑎᒋᔭᐃᓐᓇᕆᓗᒍ, ᐅᕝᕙᓘᓐᓃᑦ ᐱᖃᑎᖓᑕ ᐊᐃᑉᐸᖓᑕ ᐊᑭᓕᕈᓐᓇᖏᑉᐸᒍ ᓈᑦᑕᐅᑎᒋᓗᓂᐅᒃ, ᐊᑭᓕᔅᓱᑉᐸᓕᐋᒍᓐᓇᕋᔭᑦᑕᖓ.
ᐊᑭᓖᒋᐊᖃᑉᐳᖔ ᑖᔅᓯᔭᓪᓗᖔ ᕿᑐᖓᓂᒃ ᐃᑲᔪᕈᑎᒥᒃ ᐱᔮᓐᓃᒃ?
ᐋᒡᒐᐃ, ᐊᑭᓖᒋᐋᑐᔾᔮᖏᑦᑐᑎᑦ ᑖᔅᓯᔭᕈᑎᓂᒃ ᓇᔾᓕᐊᓂᑐᐃᓐᓇᖅ ᓱᕈᓯᒻᒧᑦ ᐃᑲᔪᕈᑎᓂ ᐱᔭᓐᓂᒃ ᐊᑭᓖᒋᐊᓕᒻᒥ ᕿᑐᖓᖃᑦᑎᐅᔪᒥᑦ.
ᑖᔅᓯᔭᕈᑎᓃᒃ ᐊᑭᓖᖏᒍᓐᓇᑉᐳᖔ ᐊᑭᓖᖃᑦᑕᓂᓐᓅᑦ ᕿᑐᖓᓐᓅᑦ ᐃᑲᔪᕈᑎᒋᕙᑦᑕᓐᓃᒃ?
ᐋᒡᒐᐃ, ᑖᔅᓯᔭᕈᑎᓂᒃ ᐊᑭᓖᙱᒍᑎᖃᕈᓐᓇᖏᑦᑐᑎᑦ ᐊᑭᓖᖃᑦᑕᓐᓂᓐᓄᑦ ᕿᑐᖓᓐᓂᒃ ᐃᑲᔪᕈᑎᒋᓗᒍ.

